ប្រជាពលរដ្ឋនៅក្នុងស្រុកក្រឡាញ់ ខេត្តសៀមរាប បានអំពាវនាវដល់លោក ស៊ុយ សែម រដ្ឋមន្ត្រីក្រសួងរ៉ែនិងថាមពល ក៏ដូចជាលោក ទៀ សីហា អភិបាលខេត្តសៀមរាប ឲ្យចាត់វិធានការទប់ស្កាត់សកម្មភាពរបស់មេឈ្មួញ សៀង ណាំ ក្នុងការវាយបំបែកថ្មភ្នំទ្រង់បាត ធ្វើអាជីវកម្មនោះជាបន្ទាន់។ ដោយហេតុថា ករណីមេឈ្មួញ សៀង ណាំ ប្រើគ្រឿងចក្រវាយបំបែកថ្មភ្នំទ្រង់បាត ធ្វើអាជីវកម្មយ៉ាងពេញបន្ទុក កំពុងធ្វើឲ្យប៉ះពាល់យ៉ាងខ្លាំងដល់ការរស់នៅរបស់ប្រជាពលរដ្ឋក្នុងមូលដ្ឋាន ក៏ដូចជាប៉ះពាល់ដល់បរិស្ថានធម្មជាតិផងដែរ ក្នុងខណៈដែលភ្នំទ្រង់បាត អាចប្រឈមនឹងការរលាយបាត់រូបរាងនាពេលឆាប់ៗខាងមុខ។ មានការរិះគន់ចំៗថា លោក មាស ជូរ៉ានី ប្រធានមន្ទីររ៉ែនិងថាមពលខេត្តសៀមរាប គិតតែពីរឿងប្រមូលលុយតាមរបៀបពុករលួយតែប៉ុណ្ណោះ ហើយករណីឃុបឃិតឲ្យមេឈ្មួញ សៀង ណាំ វាយបំបែកថ្មភ្នំទ្រង់បាត នៅស្រុកក្រឡាញ់ ធ្វើអាជីវកម្ម គឺអាចជាប្រភពចំណូលដ៏សំខាន់របស់លោក មាស ជូរ៉ានី ។
ប្រភពពីប្រជាពលរដ្ឋនៅក្នុងស្រុកក្រឡាញ់ បានឲ្យដឹងថា ភ្នំទ្រង់បាត ក្នុងស្រុកក្រឡាញ់ កំពុងប្រឈមនឹងការរលាយបាត់រូបរាងទាំងស្រុងដោយសារស្នាដៃមេឈ្មួញ សៀង ណាំ ដែលជាមេឈ្មួញល្បីឈ្មោះក្នុងខេត្តសៀមរាប និងជាតំណាងរាស្ត្រគណបក្សកាន់អំណាចផងដែរ។ តាមការអះអាងរបស់ប្រជាពលរដ្ឋបានឲ្យដឹងថា បច្ចុប្បន្នគ្រឿងចក្រជាច្រើនគ្រឿងរបស់មេឈ្មួញ សៀង ណាំ ត្រូវបានគេប្រើសម្រាប់វាយបំបែកគាស់កកាយថ្មភ្នំទ្រង់បាត ស្រុកក្រឡាញ់ ខេត្តសៀមរាប ធ្វើអាជីវកម្មយ៉ាងពេញបន្ទុក។ ចំណែកមន្ត្រីអាជ្ញាធរថ្នាក់ឃុំ ថ្នាក់ស្រុក ក៏ដូចជាមន្ទីរពាក់ព័ន្ធក្នុងខេត្តសៀមរាប នាំគ្នាសម្ងំស្ងាត់ឈឹងព្រោះខ្លាចឥទ្ធិពលរបស់មេឈ្មួញ សៀង ណាំ ដែលជាអ្នកមានទ្រព្យសម្បត្តិមហាសាលបនៅក្នុងខេត្តសៀមរាប។
បើតាមការបង្ហើបពីមន្ត្រីរាជការនៅក្នុងមន្ទីររ៉ែនិងថាមពលខេត្តសៀមរាប បានឲ្យដឹងថា ការដែលមេឈ្មួញ សៀង ណាំ ហ៊ានដាក់គ្រឿងចក្រវាយបំបែកជីកកកាយថ្មភ្នំទ្រង់បាត ស្រុកក្រឡាញ់ យ៉ាងរលូនគឺមានការឃុបឃិតបើកដៃពីសំណាក់ប្រធានការិយាល័យរ៉ែនិងថាមពលស្រុកក្រឡាញ់ ក៏ដូចជាពីសំណាក់លោក មាស ជូរ៉ានី ប្រធានមន្ទីររ៉ែនិងថាមពលខេត្តសៀមរាប ផងដែរ។ ប្រសិនបើគ្មានការឃុបឃិតបើកដៃពីសំណាក់លោក មាស ជូរ៉ានី និងមន្ត្រីក្រោមឱវាទទេនោះ គឺមេឈ្មួញ សៀង ណាំ មិនអាចធ្វើអាជីវកម្មថ្នភ្នំទ្រង់បាតនៅស្រុកក្រឡាញ យ៉ាងសុខស្រួលដូចសព្វថ្ងៃនេះទេ។ ចំណែកលោក ទៀ សីហា អភិបាលខេត្តសៀមរាប កំពុងសម្ងំស្ងាត់ឈឹងបណ្ដោយឲ្យមេឈ្មួញ សៀង ណាំ វាយបំបែកថ្មភ្នំទ្រង់បាត ធ្វើអាជីវកម្មយ៉ាងរលូន ហើយមានការឃុបឃិតពីមន្ត្រីជំនាញជាប្រព័ន្ធតែម្ដង។
បឋម
