មន្ត្រីអង្គការក្រៅរដ្ឋាភិបាលនិង សកម្មជនព្រៃឈើក្នុងខេត្តមណ្ឌលគិរី បានឲ្យដឹងថា បើទោះបី នៅក្នុងទីតាំងដីសម្បទាន សេដ្ឋកិច្ចក្រុមហ៊ុនមេឈ្មួញ សឹង សំអុល គ្មាននៅសល់ឈើ សម្រាប់កាប់ធ្វើអាជីវកម្មបន្ត ទៀតយ៉ាង ណាក៏ ដោយ ក៏មេឈ្មួញម្នាក់នេះនៅតែមាន ឈើដឹកជញ្ជូនចេញទៅ ស្រុកយួនយ៉ាងគគ្រឹកគគ្រេងដដែល។ មិនតែប៉ុណ្ណោះលោក ស្វាយ សំអ៊ាង អភិបាលខេត្តមណ្ឌលគិរី ព្រមទាំងមន្ត្រីជំនាញនិងសមត្ថកិច្ចពាក់ព័ន្ធក្នុងខេត្តនេះ មិនត្រឹមតែបណ្ដោយឲ្យមេឈ្មួញ សឹង សំអុល បំផ្លាញព្រៃឈើយ៉ាងមហន្តរាយប៉ុណ្ណោះទេ គឺថែមទាំងជួយបិទបាំងសកម្មភាពបំផ្លាញព្រៃឈើរបស់មេឈ្មួញ សឹង សំអុល ទៀតផង។ ដូច្នេះហើយទើបមេឈ្មួញ សឹង សំអុល កាន់តែបានចិត្តក្នុងការកាប់ឈើនៅក្នុងស្រុកកោះញែក ខេត្តមណ្ឌលគិរី ជាពិសេសព្រៃឈើនៅក្នុងតំបន់ដែនជម្រកសត្វព្រៃភ្នំព្រេច និងតំបន់នានាហើយដឹកជញ្ជូនចេញទៅស្រុកយួនដោយរលូន ។
ប្រភពដែលស្និទ្ធនឹងមេឈ្មួញ សឹង សំអុល បានឲ្យដឹងថា បច្ចុប្បន្នឈ្មួញជាមន្ត្រីអាវុធហត្ថម្នាក់នេះនៅតែបន្តសកម្មភាពដឹកជញ្ជូនឈើចេញទៅស្រុកយួនតាមច្រកព្រំដែនក្នុងស្រុកស្នួល ខេត្តក្រចេះ និងច្រកព្រំដែនក្នុងស្រុកមេមត់ ខេត្តត្បូងឃ្មុំ យ៉ាងពេញបន្ទុក។ ជាក់ស្ដែងថ្មីៗនេះមេឈ្មួញ សឹង សំអុល ឬឧកញ៉ា សឹង សំអុល បានប្រើប្រាស់រថយន្តធុនធំរាប់សិបគ្រឿងដឹកជញ្ជូនឈើពីស្រុកកោះញែក ខេត្តមណ្ឌលគិរី ចេញទៅស្រុកយួនយ៉ាងពេញបន្ទុក ហើយគ្មានមន្ត្រីរដ្ឋបាលព្រៃឈើឬសមត្ថកិច្ចពាក់ព័ន្ធណាហ៊ានប៉ះពាល់ឡើយ។ ជាងនេះទៅទៀតមេឈ្មួញ សឹង សំអុល បានអះអាងជាសាធារណៈថា ប្រសិនបើលោក សៅ សុខា មេបញ្ជាការអាវុធហត្ថលើផ្ទៃប្រទេស មិនបង្ក្រាបទេនោះគឺគ្មានអ្នកហ៊ានណាបង្រ្កាបខ្លួនឡើយ។
ចំណែកប្រជាពលរដ្ឋរស់នៅក្នុងស្រុកស្នួល ខេត្តក្រចេះ បានឲ្យដឹងថា បច្ចុប្បន្នមេឈ្មួញ សឹង សំអុល នៅតែបន្តប្រើប្រាស់រថយន្តធុនធំរាប់សិបគ្រឿងដឹកជញ្ជូនឈើចេញទៅស្រុកយួនតាមច្រកត្រពាំងស្រែ ស្រុកស្នួល ខេត្តក្រចេះ យ៉ាងរលូន។ ប្រជាពលរដ្ឋបានកត់សម្គាល់ថា លោក វ៉ា ថន អភិបាលខេត្តក្រចេះ និងលោក ទ្រី សុភ័ក្ត្រ នាយខណ្ឌរដ្ឋបាលព្រៃឈើក្រចេះ មិនហ៊ានប៉ះពាល់សកម្មភាពដឹកជញ្ជូនឈើរបស់មេឈ្មួញ សឹង សំអុល នោះទេដោយសារដឹងថា ឈ្មួញម្នាក់នេះមានខ្នងបង្អែករឹងមាំជាមន្ត្រីអាវុធហត្ថជាន់ខ្ពស់លើផ្ទៃប្រទេស។ បញ្ហានេះបង្ហាញយ៉ាងច្បាស់ថា បទបញ្ជារបស់លោកនាយករដ្ឋមន្ត្រី ហ៊ុន សែន ក្នុងការទប់ស្កាត់បទល្មើសរត់ពន្ធឈើចេញក្រៅប្រទេសកំពុងក្លាយជារឿងឥតន័យ ព្រោះមេឈ្មួញ សឹង សំអុល ដែលមានឈ្មោះក្នុងបញ្ជីខ្មៅរបស់លោកនាយករដ្ឋមន្ត្រី ហ៊ុន សែន នៅតែធ្វើសកម្មភាពដឹកជញ្ជូនឈើចេញទៅស្រុកយួនយ៉ាងគឃ្លើនដដែលមានន័យថាខ្លាំងក្លាជាងមុនទៅទៀត។ ប្រជាពលរដ្ឋសម្ដែងសេចក្ដីព្រួយបារម្ភយ៉ាងខ្លាំងចំពោះមហន្តរាយព្រៃឈើក្នុងខេត្តមណ្ឌលគិរី ព្រោះមេឈ្មួញ សឹង សំអុល កំពុងសម្រុកបំផ្លាញព្រៃឈើយ៉ាងពេញបន្ទុកនៅក្នុងស្រុកកោះញែកមិនញញើតអ្វីទាំងអស់។បឋម
